SUNTOK SA BUWAN
Ni:
Allan Lopez
“YOU HAVE NOTHING TO LOSE in
trying. What you lose in not going for it is the 50 percent chance
of actually achieving your goal.”
Halos
memoryado na ni Carl ang script ng speaker sa professional improvement
seminar. Ilang ulit na siyang pinadala rito sa tuwing may libreng
imbitasyon ang kumpanyang pinagtatrabahuan mula sa isang suking
supplier. Hindi naman sa wala siyang ginagawa sa opisina – siya lang
ang pinakamabagal magtrabaho, kaya siya ang willing na willing ipadala ng
kanyang boss kapag sa department nila bumabagsak ang direktibang magpadala ng
tao.
Sa
hapong iyon, araw ng Biyernes, mabilis na dumadaan sa isip ni Carl ang mga
kaganapan ng nakaraang linggo. Walong taon na siya sa kanyang trabaho – ilang
job level adjustment na rin ang kanyang nakuha, pero pareho pa rin ng
ginagawa. Natuto na siyang mabuhay ng walang nangyayari sa buhay
bukod sa pumasok, umuwi, o minsang maglakwatsa kasama ng mga kaibigan, umuwi,
gumising, at pumasok muli sa trabaho.
Pero
noong linggong iyon ay nakilala niya si Sunshine.
SI
SUNSHINE: ISA SA MGA bagong
pasok na junior managers sa research and development. Idinaan
sila ng trainer sa department nina Carl noong nakaraang Lunes bilang bahagi ng
job orientation. Pinares ang bawat bagong empleyado sa mga mas
lumang staff ng department, para ma-orient ang mga ito sa mabusisisng proseso
ng paghawak sa mga accounts.
“Lumang-luma
na ‘yan ah,” bulong ni Sunshine. Napataas ang kilay ni Carl habang
patuloy na nagbukas ng computer files. Nginuso ni Sunshine ang isang maliit na
kalendaryong nakasabit sa gilid ng cubicle. “Two years old na siya.”
“Sa
computer na lang ginagamit ko.”
“Bakit
hindi mo tanggalin?”
“Kasi
hindi naman siya dapat pansinin,” hinarap ni Carl ang computer screen kay
Sunshine, para idiing dito tumingin, “Ms. Ricaforte, tignan mo. Ito
ang halimbawa ng…” Nilapit ni Sunshine ang kanyang upuan, at
natigilan si Carl. Sa unang pagkakataon ay napagmasdan niya ng maigi
ang hitsura ng kausap: ang mahabang buhok nito, ang magandang ngiti,
ang biloy nito sa pisngi.
Napatagal
ng kaunti ang kanyang pagtitig, at natauhan na lamang nang magtanong si
Sunshine. “Example ng ano?”
LUNES. LUBOS
NA PINAGTAKHAN NI Carl
ang madalas nilang pagbabanggaan ni Sunshine. Bagbalik niya galing siya isang
client meeting, siya namang paglabas ni Sunshine sa building kasama ang ilang
kaibigan. Noong pumunta siya sa copying room dala ang ilang
dokumento, siya namang paglabas ni Sunshine sa katabing
pantry. Tatlong beses pa silang nagkasabay sa elevator.
Hindi
na siya nagtaka noong pumasok si Sunshine sa pantry habang siya’y kumakain bago
umuwi. Gaya ng nakagawian ay nakalimutan na naman niyang
mananghalian. Nginitian siya nito, at nagtungo sa may
lababo. Binuksan ni Sunshine isa-isa ang mga kabinet. Nang
hindi makita ang hinahanap, nakapamaywang na sinuyod ng tingin ang mga mesa.
“Ano
ba hinahanap mo, Ms. Ricaforte?”
“Sunshine
na lang.” Kagat labi itong ngumiti, tila biglang nahiya. “Payong ko.”
“Naku,
hindi mo makikita ‘yan.”
“Bakit?”
“Hanap
ka kasi ng hanap. Relax ka lang. Bigla mo na lang
makikita.” Mabilis na napaisip si Carl kung maayos ba – pogi ba –
ang hitsura niya noong hapong iyon. Oo naman. Ata. Basta,
sabi niya sa sarili. “Halika, join me
mag-lunch. Hahanapin natin ng sabay ang payong mo mamaya.”
“Alas
sais na, ngayon ka lang kumakain ng lunch?” Natatawang tumabi sa
kanya si Sunshine.
“DON’T FORGET TO EAT BREAKFAST :P Hahanapin
pa natin payong ko.” Text message ni Sunshine ang unang nabasa ni
Carl ng magising kinabukasan. Masigla siyang naghanda pumasok noong
araw na iyon. Laking pagtataka ng nanay niyang si Aling Ludy ng
madatnan siya nitong nakaupo na sa mesa habang naghahanda pa lamang siya ng
almusal. “Nakapaligo ka na?”
“Kuya,
bakit ang laki ng ngiti mo?” Si Chiqui, ang nakababatang kapatid niyang kauuwi
lang – agent ito sa isang call center. “Na-promote ka ba?”
Natawa
lamang si Carl.“Huwag ka ngang makialam sa usapang
matatanda.” Bagamat professional na, bata pa rin ang tingin niya kay
Chiqui. Siya ang tumayong breadwinner ng pamilya mula noong malugi
ang pinagtatrabahuan ng nanay nila, at siya ang tumustos sa pagaaral nito. “Seriously,
maganda lang ang gising ko.”
“Hello,
kuya, kapag maganda ang gising mo, natutulog ka lang ulit. Huwag ka
nga plastic. Hindi ka naman marunong ngumiti.”
Si
Aling Ludy naman ang napahagikhik, at tumabi sa dalawang anak. “Oo
nga. Mabait ka, pero mas madalas ka pang humatsing kaysa
ngumiti. Nag-apply at natanggap ka na ba sa Crusader?”
“Naku,
Ma, nawala na nga sa isip ko ‘yon!”
Ang
Philippine Crusader ang tinutukoy ni Aling Ludy. Isa sa mga
pinakatanyag na peryodiko sa bansa, na pangarap niyang pasukan noong siya’y
nasa kolehiyo pa’t nangangarap maging peryodista. Kinailangan niyang
pumasok sa isang corporate job dahil sa mga naging pangangailangan ng
pamilya. Hindi kayang tustusan ng maliiit na suweldo ng peryodista
ang magtaguyod ng kanilang pamilya.
“Oo
nga, kuya. Mag-apply ka na sa Crusader kung gusto
mo. After all, malapit na akong mag-Singapore. Magawa mo
man lang ang gusto mo.”
Ang
totoo niya’y nakaliligtaan na lamang ni Carl na mag-apply sa pinapangarap na
pasukang peryodiko. Oo, dalawang taon nang tapos sa pagaaral si
Chiqui, at nakakatulong na sa mga gastusin. Pero parang nanlamig na
lamang si Carl sa dating pinangarap.
Ngumiti
lamang si Carl habang sinisimsim ang mainit na kape. Tama ang
paalala ng kanyang kapatid at ina. Pero mali sila. Sa
pagkakataong iyon, walang kinalaman sa sariling pangarap ang kanyang magandang
mood.
INAYA
NI CARL SI SUNSHINE sa
paborito nitong kantinang malapit sa opisina. Wala na sa business
district, pero walang limang minuto galing sa opisina. Isang “hole
in the wall” kung tawagin. Ni walang pangalan, at paborito ni Carl
dahil palaging bagong luto ang pagkain at halos walang kumakain lagpas ng
ala-una.
“Sana
ok lang sa’yo rito. Hindi sosyal, pero masarap ang
pagkain. Lutong bahay, kasi nga naman bahay lang talaga siya.”
“Mas
gusto ko rin dito kaysa fastfood.”
“Talaga? Kala
ko puro sosyaling restawran lang kinakainan mo.”
“Bakit
mo naman naisip ‘yan?”
“Kasi
medyo maganda ka.”
“Medyo
lang?” Pumalahaw ng tawa si Sunshine.“Kikay lang ako pero hindi
sosyalera. Mga simpleng bagay lang ang gusto ko. Gaya
mo.”
Dinala
ng serbidora ang inorder na sinigang na isda ni Sunshine at adobong manok ni
Carl. Nagsalo sila ng ulam. “Kunwari, dalawa ang inorder
natin,” biro ni Sunshine. Masigla silang nagkukuwentuhan habang
kumakain, parang matalik na magkaibigang matagal na hindi
nagkita. Kinuwento ni Sunshine ang paglipat nito sa Maynila galing Cebu,
kung saan ito nagtrabaho ng ilang taon pagkatapos magtapos sa UP
Visayas. Binanggit din ni Carl ang naging usapan nila ng kanyang ina at
kapatid, tungkol sa kagustuhan niya dating magtrabaho para sa isang peryodiko.
“Naku
kaya pala naging magkasundo tayo,” bulalas ni Sunshine, “Galing ako sa pamilya
ng mga writers. Ang tatay ko, retiradong editor ng Visayan
Star. Nanay ko, nagtuturo ng creative writing sa San Carlos, at ang
dalawang kapatid ko, na nandirito rin sa Maynila, parehong nagsusulat
din. Makata ang isa, tapos iyong isa, playwright. Ako
lang ang naging accountant.”
“Hindi
naman ako manunulat talaga. Pinangarap ko lang noon, mapakinabangan
man lang ang degree ko. Journalism kasi.”
“Pero
naglalaro pa rin sa isip mo.”
“Medyo.”
“Ibig
sabihin gusto mo pa rin.”
Inubos
ni Carl ang natitirang softdrinks. “Siguro. Pero masyado na akong
matanda para pumasok ng entry level sa diyaryo. Medyo maliit lang
ang kita.”
“Akala
ko ba tapos na ang kapatid mo at magaabroad na? I bet, willing
siyang tulungan ka sa gastusin. Maayos naman kasi ang kita
pagkalipas ng ilang taon lang, maski maliit ang kubra sa simula.”
“Pero
matanda na ako. Gaya ng ng paalala ng nanay ko, dapat lumagay na sa
tahimik.” Nagsindi ng sigarilyo si Carl habang hinihintay si
Sunshine. “Paano na lang kung gusto ko magka-girlfriend. Mahirap
naman manligaw ng maliit ang kita.”
“’Di
na uso ‘yon ngayon. Hanap ka na lang ng liligawanan na maraming
pera.”
“Manligaw
ako ng manager, ganoon?”
“Maski
junior manager, puwede na.”
Nagtawanan
silang dalawa, at bahagyang namula si
Carl.
NAGING
MALIMIT NA TABLE CONVERSATION ng
mga sumunod na araw ang pangarap ni Carl na maging peryodista. Lubos
na naging interesado si Sunshine sa kakayahan ni Carl. Nahalungkat
pa nga nito ang isang lumang company newspaper kung saan lumabas ng ilang
article at tula ni Carl. Naibigan niya, lalo na ang mga tula.
Nakagawiang
ihatid ni Carl si Sunshine. Bago makasakay ng jeep noong ng
Huwebes, may inabot itong brown evelope. Basahin daw niya pag may
panahon siya. Inusisa ni Carl pagbalik sa opisina. Ilang
clippings mula sa classified ads ng Philippine Crusader. Opening
para sa isang manunulat na may background sa IT at multinational
corporation.
Napasandal
si Carl at bahagyang natawa. “Pinagtutulakan mo na ako niyan, ha.”
Kinausap niya ang silya na noong Lunes lang ay inupuan ni Sunshine, noong una
silang nagkakilala. “Sige, fine, gagawin ko ang gusto ko sa
buhay. Pero paano na tayo niyan? Nagsisimula pa lang
akong magpa-cute sa’yo.”
Natawa
si Carl sa pagsasalitang mag-isa, at naghandang umuwi. Bago lumabas
ng cubicle, napansin niya ang kalendaryong tinuro ni Sunshine noong una siyang
nandirito. Hindi na nga niya matandaan kung bakit nakasabit pa rin
ito. Lalong hindi niya matandaan kung bakit palagi niyang
nakakaligtaang itapon ito.
Inisip
ni Carl kung mas maganda nga na may espesyal na dahilan na naiwan niya ito rito
– halimbawa’y tumigil ang panahon dahil iniwan siya ng dating kasintahan – o
wala. Boring ang walang dahilan. Walang katuturan, at
medyo kahina-hinayang. Pero wala naman talaga. Nakaligtaan lang
niya, gaya ng maraming bagay sa kanyang buhay.
Tinapon
niya ang kalendaryo sa basurahan.
GAYA
NG DATI, ALAS KUWATRO pa
lang ay tapos na ang professional improvement seminar. Nag-ikot muna
sandali sa mall si Carl para bumili ng cake. May pinaplano siyang
maliit na celebration pagkauwi. Pagbalik niya sa opisina ay inayos
niya ang lahat ng mga gamit sa kanyang desk at kinausap ang kaniyang
boss. Masinsinang usapan na inabot ng halos alas siyete ng gabi.
Umuulan
ng lumabas ng building si Carl.
“Akala
ko may seminar ka?”
Nagulat
si Carl ng tignan ang pinanggalingan ng boses. Si Sunshine pala ay
nakatayo sa isang sulok, hindi makauwi. “Meron nga. Kanina pang
alas kuwatro natapos. Nawala mo na naman payong
mo?” Minuwestra ni Carl ang dala-dalang cake. “May konti
kaming celebration sa bahay. Kung wala kang gagawin, daan ka muna.
Malaman mo na rin kung saan ako nakatira.”
“Birthday
mo?”
“Hindi. Nag-tender
ako ng resignation.” Binuksan ni Carl ang pang-dalawalang payong na
dala. “Ito lang ang meron ako ngayon na wala ka. Poor na ako
ngayon. Ikaw may kasalanan. Kaya halika na, ihahatid kita sa inyo
mamaya pagkatapos kumain.”
Kinuha
ni Sunshine ang cake na dala ni Carl at sumukob sa payong na dala
nito. “Paano na lang ako kung wala ka,” biro nito. Napangiti na
lamang si Carl.
“Lalo
na ako…” Inakbayan ni Carl si Sunshine, hinila itong papalapit, at nagpasalamat
sa magandang timing ng ulan. “Halika na, Ms. Junior Manager.”
Walang komento:
Mag-post ng isang Komento